ബെംഗളൂരു: സംസ്ഥാന തലസ്ഥാനമായ ബെംഗളൂരുവിൽ വരും ദിവസങ്ങളിൽ ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ (ഐഎംഡി) മുന്നറിയിപ്പ്. മേയ് 14 വരെ നഗരത്തിൽ ഇടിമിന്നലോടുകൂടിയ വ്യാപകമായ മഴ ലഭിക്കാൻ സാധ്യതയുണ്ടെന്നാണ് റിപ്പോർട്ട്. മേയ് 12 മുതൽ 14 വരെയുള്ള ദിവസങ്ങളിൽ മഴ കൂടുതൽ ശക്തമാകാനാണ് സാധ്യത. പ്രധാനമായും വൈകുന്നേരങ്ങളിലും രാത്രി സമയങ്ങളിലുമായിരിക്കും മഴ സജീവമാകുകയെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.
നഗരത്തിന് പുറമെ കർണാടകയുടെ മറ്റ് ഭാഗങ്ങളിലും ഇടിമിന്നലോടു കൂടിയ മഴ തുടരാൻ സാധ്യതയുണ്ട്. തീരദേശ കർണാടക, വടക്കൻ ഉൾനാടൻ കർണാടക, തെക്കൻ ഉൾനാടൻ കർണാടക എന്നിവിടങ്ങളിലെ വിവിധ ജില്ലകളിൽ മേയ് 14 വരെ മഴ മുന്നറിയിപ്പ് നൽകിയിട്ടുണ്ട്. ശക്തമായ കാറ്റിനും മിന്നലിനും സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.
വേനൽച്ചൂടിൽ വെന്തുരുകുന്ന നഗരത്തിന് ആശ്വാസമായാണ് മഴയെത്തുന്നത്. എന്നാൽ താഴ്ന്ന പ്രദേശങ്ങളിൽ വെള്ളക്കെട്ടിനും ഗതാഗത തടസ്സങ്ങൾക്കും സാധ്യതയുള്ളതിനാൽ നഗരവാസികൾ മുൻകരുതൽ സ്വീകരിക്കണം. മഴയോടൊപ്പം ശക്തമായ കാറ്റ് വീശാൻ സാധ്യതയുള്ളതിനാൽ മരങ്ങൾക്കും വൈദ്യുതി ലൈനുകൾക്കും താഴെ നിൽക്കരുതെന്നും ജാഗ്രതാ നിർദ്ദേശത്തിൽ പറയുന്നു.
